Croeso i gynllun Cerdded Er Lles Iechyd Caerdydd.

Mae cerdded yn hawdd, am ddim ac yn agored i bawb bron iawn, waeth beth yw eu gallu corfforol neu gyflwr eu hiechyd.

Mae Cerdded Er Lles Iechyd yn gyfres o deithiau cerdded sy’n cael eu trefnu ledled y ddinas sydd wedi eu datblygu i fod yn agored i bobl sydd heb wneud fawr ddim ymarfer corff o’r blaen. Mae cyfres o deithiau tywys rheolaidd wedi eu datblygu gydag arweinwyr teithiau cerdded ac fe gynghorir cerddwyr i’w chymryd hi’n ara’ deg am ychydig wythnosau gan adeiladu at rywbeth ychydig yn fwy heriol pan fyddan nhw’n barod.

Mae manteision lu i gerdded ac mae cerdded mewn grŵp yn arwain at fanteision corfforol ond hefyd y cyfle i gael cyswllt cymdeithasol a chefnogaeth gan eraill.

Mae Cerdded Er Lles Iechyd yn gyfle i greu ffrindiau a mwynhau yr awyr iach tra’n gwella ffitrwydd neu aros yn heini. Mae’r teithiau i gyd yn deithiau cerdded byr, hawdd eu cyrraedd, fel rheol rhwng 1 a 3 milltir neu 30 i 90 munud o hyd. Mae’r teithiau ar agor i bawb. Mae rhai’n fwy addas na’i gilydd ar gyfer bygis a defnyddwyr cadair olwyn – cysylltwch â’n Cydlynydd i gael rhagor o gyngor.

Grwpiau Cerdded

Ar hyn o bryd mae yna 7 grŵp cerdded ar draws Caerdydd, o Riwbeina i Fae Caerdydd. Mae’r grwpiau yn amrywio yn eu maint ac mae pob grŵp wedi dewis nifer o lwybrau yn ofalus o fewn eu cymunedau sy’n addas ar gyfer teithiau cerdded iach. Mae pob taith rhwng 30 a 90 munud o hyd ac yn digwydd ar dirwedd resymol.

Mae’r grwpiau cerdded yng Nghaerdydd yn gyfeillgar a chroesawgar iawn ac yn anelu i roi profiadau cerdded cadarnhaol i bawb.

Sut alla i gymryd rhan?

Dewch draw ychydig funudau cyn yr amser a hysbysebwyd. Wrth i chi gyrraedd bydd gofyn i chi lenwi ffurflen cyswllt brys a holiadur iechyd sydyn i roi gwybod i drefnwyr y daith am unrhyw gyflwr sydd gennych chi. Os ydych yn ansicr o’ch gallu i gymryd rhan ar daith gerdded, holwch eich meddyg teulu am gyngor cyn i chi fynychu. Dim ond ar gyfer eich taith gyntaf y mae gofyn i chi lenwi ffurflenni ac wedi hynny gallwch gerdded gydag unrhyw grŵp.

Os oes unrhyw ymholiad gennych cysylltwch â chydlynydd Cerdded Er Lles Iechyd Caerdydd.